மகிழ்ச்சி…! தீபாவளி இலவச அரிசி, சர்க்கரைக்கு பதில் பணம்… நேரடியாக வங்கி கணக்கில் செலுத்தப்படும்…!

புதுச்சேரி யூனியன் பிரதேசத்தில் உள்ள குடும்ப ரேஷன் அட்டைதாரர்களுக்கு தீபாவளிக்கு 10 கிலோ இலவச அரிசி மற்றும் 2 கிலோ சர்க்கரைக்கு பதிலாக இந்த ஆண்டு பணமாக ரூ.490 வழங்க முடிவு செய்யப்பட்டுள்ளது. இந்த பணம் அவர்களது வங்கிக் கணக்கு மூலம் நேரடியாக செலுத்தப்படும் என புதுச்சேரி அரசு அறிவித்துள்ளது.

இது குறித்து குடிமைப் பொருள் வழங்கல் மற்றும் நுகர்வோர் விவகாரங்கள் துறை இயக்குநர் எஸ்.சத்தியமூர்த்தி வெளியிட்ட அறிவிப்பில், 3.37 லட்சம் குடும்ப ரேஷன் கார்டுதாரர்களுக்கு தலா ரூ.490 நேரடிப் பலன் பரிமாற்ற முறையில் வழங்கப்படும் என்று தெரிவித்தார். இருப்பினும் அரசு ஊழியர்களுக்கு இந்த தொகையை செலுத்த உரிமை இல்லை என்று அந்த அறிக்கையில் கூறப்பட்டுள்ளது.

இதனால் அரசுக்கு ரூ.16.52 கோடி செலவாகும். அரசு கடந்த காலங்களில் நியாய விலைக்கடைகள் மூலம் அரிசி மற்றும் சர்க்கரையை விநியோகம் செய்து வந்தது. இனி வரும் தீபாவளி பண்டிகைக்கு இலவச அரிசி மற்றும் சர்க்கரைக்கு இணையான ரொக்கம் அட்டைதாரர்களின் வங்கிக் கணக்குகள் மூலம் செலுத்தப்படுகிறது.