நிதானம் காட்டிய கம்மின்ஸ்: 68 பந்துகளில் 12 ரன்கள் எடுத்து ஆஸி. வெற்றிக்கு உதவி!

மும்பை: நடப்பு உலகக் கோப்பை தொடரில் ஆப்கன் அணிக்கு எதிராக அபார வெற்றி பெற்றுள்ளது ஆஸ்திரேலியா. இந்த வெற்றிக்கு அந்த அணியின் பேட்ஸ்மேன் மேக்ஸ்வெல் மற்றும் கேப்டன் கம்மின்ஸ் இடையே அமைந்த கூட்டணி தான் பிரதான காரணம்.

இருவரும் இணைந்து 8-வது விக்கெட்டுக்கு 202 ரன்கள் பார்ட்னர்ஷிப் அமைத்தனர். இதில் மேக்ஸ்வெல்லின் பங்கு 179 ரன்கள். கம்மின்ஸின் பங்கு வெறும் 12 ரன்கள். இதற்காக அவர் 68 பந்துகளை எதிர்கொண்டு இருந்தார். களத்தில் 122 நிமிடங்கள் பேட் செய்திருந்தார். உலகக் கோப்பை கிரிக்கெட் வரலாற்றில் ஒரு இன்னிங்ஸில் பதிவு செய்யப்பட்ட மிகக் குறைந்த ஸ்ட்ரைக் ரேட்டில் (2-ம் இடம்) அவரது இந்த நிதான இன்னிங்ஸும் இடம் பெற்றுள்ளது.